Harii iha estabilidade

Mensajen husi Reprezentante Espesiál Interinu ONU nian iha Timor-Leste Finn Reske-Nielsen

Parseria ne'ebé forte entre Timor-Leste no Nasoins Unidas hahú hori uluk ho apoiu organizasaun ne’e nian ba Timor-Leste nia luta ba auto-determinasaun no Konsulta Populár ne’ebé istóriku iha 1999. Dezde momentu ne’ebá, Timor-Leste simu tiha ona operasaun manutensaun pás no polítika ONU nian lima no mós prezensa signifikativa husi fundu, ajénsia no programa sira ONU nian.

Konsellu Seguransa ONU nian mobiliza Misaun Integrada Nasoins Unidas nian iha Timor-Leste (UNMIT) hodi responde ba krize interna ne’ebé doko Timor-Leste iha Abríl no Maiu 2006. Krize ne’e halo ema sai dezlokadu to’o na’in-150.000, ne’ebé barak mak hela iha kampu refujiadu iha Dili no Baukau laran tomak. Tensaun sai boot, ho eis membru forsa seguransa sira-ne’ebé armadu, livre iha zona rurál.

Kria kondisaun sira ba pás ne'ebé duravel

Iha 25 Agostu 2006 Konsellu Seguransa ONU adota Rezolusaun 1704, ne’ebé fó mandatu ba UNMIT atu kaer provizoriamente implementasaun lei no seguransa públika to’o polísia nasionál bele harii filafali no sai prontu tiha hodi kaer knaar sira-ne’e. Mandatu abranjente ne’e inklui ajuda Governu hodi organiza eleisaun sira, harii kapasidade ba setór governasaun, justisa no seguransa, haforsa mekanizmu direitus umanus, no kompleta investigasaun sira ba kazu sira kona-ba violasaun grave ba direitus umanus ne’ebé ema komete iha 1999. Mandatu ne’e fó apoiu ba Governu nia mekanizmu sira ba koordenasaun doadór no ba promosaun igualdade jéneru iha harii instituisaun no estabelese polítika.

UNMIT nia mandatu tradús ba iha komponente polísia ONU nian ida-ne’ebé boot ho membru polísia liu na’in-1.600 husi país 41, no funsionáriu sivíl maizumenus na’in-1.900 inklui timoroan no internasionál sira. Dezde kriasaun UNMIT nian, ami-nia funsionáriu sira halo serbisu ho segmentu sira hotu sosiedade Timor-Leste nian, husi forsas armadas no polísia, to’o Parlamentu Nasionál no partidu polítiku sira, no to’o ba grupu sosiedade sivíl sira, no mídia sira iha país laran tomak, atu ajuda Timor-Leste hodi alkansa estabilidade, harii Estadu ida-ne’ebé reziliente, no hadi’a sidadaun sira hotu nia moris.

ONU nia apoiu kontinua maka'as

Ha’u orgullu tanba kontribuisaun ne’ebé UNMIT no ONU nia ajénsia, fundu no programa sira halo hodi apoia susesu sira Timor-Leste nian durante tinan neen ikus ne’e.

UNMIT nia enserramentu sei la signifika katak parseria entre Timor-Leste no Nasoins Unidas hotu ona. Kontráriu fali, bainhira pesoál manutensaun pás arranka tiha, ami hein atu iha faze foun ida iha relasaun ida-ne’e. Importante liu, família ONU nian sei kontinua atu fornese apoiu ba instituisaun nasionál sira iha elaborasaun no implementasaun programa sira ba dezenvolvimentu ne’ebé aseleradu, liuhusi ONU nia ajénsia, fundu no programa sira.

Omenajen ba povu Timor-Leste nian

Bainhira ha’u to’o mai Timor-Leste ba dala uluk iha 1999, país ne’e naksobu husi funu no ajitasaun polítika no nakdoko tanba dezlokamentu no terus. Parte barak husi país ne’e hetan sunu-mohu. Nu’udar priviléjiu ida tiha ona atu tuir Timor-Leste nia dalan sai hosi tempu difisil sira ba pás, estabilidade no futuru ida-ne’ebé furak, seguru no prósperu liután.

Dalan tuirmai sei, laiha dúvida, marka ho dezafiu barak. Dezenvolve parte ekonomia ne’ebé la depende ba petróleu, liuliu setór privadu, sei sai importante tebes atu iha dezenvolvimentu sósiu-ekonómiku nafatin. Garante oportunidade ba edukasaun, empregu ba foin-sa’e sira, no dezenvolvimentu ekuitativu sei ezije serbisu maka'as husi autoridade sira Timor-Leste nian, ho apoiu husi sira-nia parseiru internasionál sira. Kontinua harii tan ba oin susesu profisionál servisu polísia nian  sei hametin tan sira-nia kapasidade atu hasoru dezafiu sira iha futuru.

Ha’u laran-metin ba instituisaun no sidadaun sira Timor-Leste nian katak sira sei aproveita oportunidade sira ne’ebé mosu iha sira-nia oin, no alkansa sira-nia objetivu.

Hodi UNMIT nia pesoál hotu sira-nia naran, ha’u hakarak agradese povu Timor-Leste no nia lider sira tanba parseria forte ne’ebé ita hotu hala’o ho di’ak durante tinan neen ikus ne’e, no hato’o ami-nia dezeju di’ak ba futuru.

 

Finn Reske-Nielsen
Reprezentante Espesiál Interinu ONU nian iha Timor-Leste