Mensajen husi Sekretáriu-Jerál ONU Ban Ki-moon

Povu Timor-Leste nian hetan tiha ona progresu estraordináriu dezde sira ho aten-barani vota ba independénsia iha 1999. Ha’u hato’o parabéns ba sira tanba sira la’o ba oin iha diresaun ba objetivu hodi halo Timor-Leste sai independente no prósperu.

Bainhira Misaun Integrada Nasoins Unidas nian iha Timor-Leste remata ninia mandatu, iha tinan ne’e nia rohan, dékada ida resin ho apoiu husi Manutensaun Pás Nasoins Unidas nian ba país ne’e sei hotu. Ita hotu bele orgullu tanba parseria ba pás ida-ne'e.

Ha’u basa liman liuliu ba povu no Governu Timor-Leste nian tanba rezultadu impresionante ne’ebé sira konsege hetan dezde restaurasaun independénsia iha 20 Maiu 2002. Família Nasoins Unidas nian – ami-nia misaun manutensaun pás sira hamutuk ho ami-nia ajénsia, fundu no programa sira-ne’ebé lida ho kestaun umanitária no dezenvolvimentu nian – sente katak priviléjiu ida mai ami atu la’o hamutuk ho timoroan sira liu husi prosesu susar harii-nasaun nian.

Instituisaun nasionál sira, ne’ebé uluk sei nurak iha 2002, agora daudaun salvaguarda estabilidade no demokrasia. Governu sira tuituir malu foti medida konkreta oioin atu hadi’ak tan sidadaun sira-nia moris no harii aliserse ba dezenvolvimentu. Sistema justisa hetan progresu importante oioin hodi defende Estadu Direitu nian. Polísia nasionál no forsas armadas reforsa sira-nia kapasidade hodi garante seguransa ba sidadaun timoroan sira.

Liuliu, povu Timor-Leste nian hatudu tiha ona sira-nia vontade metin no laran-maka’as hodi ultrapasa dezafiu boot, no nasaun nia lider sira hatudu matenek no responsabilidade hodi lori nasaun ba oin iha tempu susar nia laran.

Enkuantu ita haree ba oin, ba knaar barak ne’ebé sei presiza halo, ita bele hetan inspirasaun husi susesu sira-ne’e.

Ha’u espesialmente kontente tanba Timor-Leste halo tiha ona tranzisaun husi situasaun ne’ebé simu asisténsia manutensaun pás nian ba situasaun ne’ebé kontribui ho pesoál ba operasaun Nasoins Unidas nian iha fatin seluseluk ne’ebé hetan problema iha mundu rai-klaran. Sei la bele iha testemuñu di’ak liu ba valór manutensaun pás nian duké iha Timor-Leste hamutuk ho ami nu’udar parseiru iha atividade emblemátika Nasoins Unidas nian ida-ne’e.

Espozisaun multimédia ida-ne’e hatudu Timor-Leste no timoroan sira-nia enerjia iha kultura no selebrasaun, eleisaun iha dame nia laran, edukasaun, desportu, vida no atividade iha lurón no merkadu – buat sira-ne’e hotu nu’udar aspetu husi prosesu harii-nasaun ne’ebé sei kontinua ba futuru. Ha’u espera katak ema ne’ebé haree espozisaun ne’e sei hetan inspirasaun hodi tau matan ba problema globál barak ne’ebé ita hasoru.

Maski UNMIT arranka ona, Nasoins Unidas sei kontinua metin iha ami-nia apoiu ba povu no Governu Timor-Leste nian enkuantu sira harii daudaun futuru kmanek liután.

Viva Timor-Leste!

 

Ban Ki-moon
Sekretáriu-Jerál Nasoins Unidas nian
Nova Iorke, 2012