Nasoins Unidas emblem

Oinsá maka ita harii nasaun ida husi ahi-kadesan konflitu nian?
Tenke hahú ho vizaun ida

Vizaun ida ba independénsia

Timor-Leste hatudu vontade atu hetan auto-determinasaun bainhira deklara independénsia husi Portugál iha Novembru 1975. Forsa militár indonézia invade liutiha semana ida. Tanba ne'e funu gerrilla kontra okupasaun la'o durante tinan 24, enkuantu juventude, jornalista sira, grupu solidariedade, no instituisaun relijioza oioin defende kauza Timór nian iha rai-laran no internasionalmente.

Timoroan barak selu ho sira-nia vida tanba hakarak auto-determinasaun. Tuir estimativa husi Komisaun Simu-malu, Lia-loos no Rekonsiliasaun (CAVR) Timor-Leste nian entre 1975-1999 pelumenus ema nain-102,800 hetan oho ka mate tanba hamlaha no moras.

Direitu ba auto-determinasaun, ne'ebé konsagra iha Karta Nasoins Unidas nian, maka direitu povu ida nian atu deside ninia destinu rasik. Ho finalidade ne'e, Nasoins Unidas hala'o Konsulta Populár iha 30 Agostu 1999 atu fó biban ba povu Timor-Leste nian hodi deside se sira hakarak ka lakohi autonomia espesiál iha Indonézia nia laran. Maioria boot ho porsentu 78,5 husi votante sira rejeita autonomia espesiál proposta ne'e, no nune'e loke dalan ba independénsia totál.

Liutiha votasaun ne'e forsa pró-autononia sira hahú kedas sunu arbiru ho hahalok aat tebes seluseluk iha nasaun tomak. Sira sobu maizumenus porsentu 70 husi infraestrutura nasaun nian. Ema rihun atus hira lakon sira-nia hela-fatin no ema liu 1200 hetan oho. Tuir estimativa sira obriga ema na'in-230.000 atu tama iha territóriu Indonézia nian iha Timór Loromonu.

Hodi hatán ba krize ne'e, Konsellu Seguransa ONU nian autoriza forsa intervensaun ida atu restaura orden no depois estabelese administrasaun tranzitória ida atu kaer jestaun nasaun nurak ne'e nian enkuantu instituisaun formál sira Estadu nian komesa estabelese. Liutiha tinan tolu, iha 20 Maiu 2002, Timor-Leste nia independénsia restaura ofisialmente hodi sai nasaun foun Repúblika Demokrátika Timor-Leste.

Iha 2012, povu Timor-Leste nian ho orgullu selebra Restaurasaun Independénsia nia aniversáriu ba dala 10 iha ambiente dame no otimizmu nian.