Nasoins Unidas emblem

Oinsá maka ita harii nasaun ida husi ahi-kadesan konflitu nian?
Tenke harii konfiansa, manán konfiansa, no aprende atu iha konfiansa

Konfiansa ba malu,
ba lei no instituisaun públika sira

Timor-Leste nia Komisaun Simu-Malu, Lia-Loos no Rekonsiliasaun iha 2001 hahú prosesu kura nian ida ba ema ne'ebé terus no família no komunidade sira ne'ebé fahe malu tanba konflitu. Komisáriu timoroan sira rona no rejista istória husi maizumenus ema na'in-8.000 ne'ebé terus durante períodu 1974 to'o 1999. Liuhosi fó biban ba ema atu ko'alia kona-ba esperiénsia sira-ne'e, Komisaun ajuda komunidade no família sira atu komesa harii filafali sira-nia konfiansa ba malu.

Ema ne'ebé uluk dezlokadu internu fila fali ona ba sira-nia uma kleur tiha ona, no fiar katak sira seguru iha sira-nia komunidade nia leet. Ho konfiansa katak sira iha futuru ida ne'ebé seguru, agora ne'e daudaun timoroan sira harii sira-nia uma, investe iha edukasaun, hamosu negósiu ki'ik oioin, kaben ho idade boot liu no iha oan natoon de'it. Timoroan sira balu ne'ebé uluk iha 1999 ema obriga atu emigra ba Indonézia fila fali mai uma tiha ona.

Povu Timor-Leste nian harii sistema governu demokrátiku ida ho Konstituisaun nu'udar baze. Sira aprova lei oioin hodi garante sidadaun sira-nia direitu ba hahán, hela-fatin, edukasaun, bee moos no saneamentu. Sira ratifika tiha ona tratadu direitus umanus internasionál hitu ne'ebé importante, halo violénsia doméstika sai krime, no estabelese komisaun ida atu luta kontra korrupsaun. Liuhosi medida sira-ne'e no seluseluk, Timor-Leste hetan dinamizmu hodi garante sidadaun sira-nia direitu, no hahú prosesu harii konfiansa ba lei no ba instituisaun sira.