Nasoins Unidas emblem

Oinsá maka ita harii nasaun ida husi ahi-kadesan konflitu nian?
Tenke hato'o ita-nia lian

Liberdade-espresaun
haburas kultura demokrátika

Ema rona povu Timor-Leste nia lian iha mundu tomak iha 30 Agostu 1999 bainhira timoroan sira vota iha Konsulta Populár ho maioria boboot hodi sai nasaun independente. Dezde aktu auto-determinasaun ne'e, sidadaun Timor-Leste sira-nia lian sai maka'as liu ba beibeik.

Ema timoroan balu komesa hato'o sira-nia lian liuhosi Komisaun Simu-Malu, Lia-Loos no Rekonsiliasaun, ne'ebé fó biban atu rona ema na'in-8000 resin ne'ebé terus durante konflitu 1974-1999 konta sira-nia istória. Tanba sira hahú la sente ta'uk ona hodi hato'o sira-nia lian iha sira-nia nasaun rasik, Timor-Leste nia poeta, kantadór, pintór, artista grafiti no seluseluk tan fó-sai sira-nia terus, hirus, ideia no mehi. Televizaun no rádiu nasionál, no mós estasaun rádiu komunitária no jornál independente sira sai boot liu ba beibeik. Ohin loron, sira komunika liuliu ho lian tetun no portugés, nu'udar lian ofisial rua Timor-Leste nian.

Liberdade espresaun ida-ne'e nu'udar baze ba kultura demokrátika ne'ebé hahú buras. Partisipasaun iha eleisaun aas tebes bainhira kompara ho nasaun sira seluk iha mundu, maski komunidade barak hasoru obstákulu hodi la'o-rai tanba izolamentu jeográfiku. Ema-dadur iha direitu atu vota, prátika ida ne'ebé seidauk padraun iha nasaun balu. Observadór eleitorál espesiál ho defisiénsia ajuda atu garante katak ema seluk ne'ebé iha defisiénsia bele vota.

Feto no labarik, ne'ebé dala barak terus aat liu iha sosiedade sira-ne'ebé rahun tanba konflitu, partisipa duni iha Timor-Leste nia prosesu nasionál sira ba dame no estabilidade. Feto hato'o daudaun sira-nia lian iha parlamentu, ho kadeira porsentu tolunulu-resin-ualu husi totál – nivel reprezentasaun feto nian ne'ebé aas liu hotu iha Ázia.

Juventude mós hetan reprezentasaun liuhosi programa pilotu inovadór ida ho naran parlamentu foin-sa'e nian ne'ebé inklui membru na'in-130, feto-raan no mane foin-sa'e, husi distritu ida-idak iha nasaun laran. Ne'e maneira ida ba Timor-Leste atu rona lian husi juventude, ne'ebé terus tanba trajédia konflitu nian no lakon oportunidade oioin tanba infraestrutura no sistema sira rahun hotu.